Shalom!
Ibigaragaza ko umuntu yiyeguriy’Imana igice ca 2.
2. Yicisha bugufi
1 Pierre 5:6-11 “Nuko mwicishe bugufi muri musi y’ukuboko kw’Imana kw’ubushobozi, kugira ngw’iz’ ibashire hejuru mu gihe gikwiye. 7 g Muyikorere amaganya yanyu yose, kukw ibababara. 8 h Mwirinde ibiboreza, mwame mugavye: umurezi wanyu, ari we wa Murwanizi, agendagenda nk’intambge yivuga, arondera uwo arotsa. 9 i Mumurwanye mufise ukwizera gushikamye, muzi yukw imibabaro ihwanye n’iyanyu ishitswa kuri bene Data bari mw isi. 10 j Kand’ Imana igira ubuntu bgose, yabahamagariye ubgiza bgayo budashira muri muri Kristo, ni mwaheza kubabazwa akanya gato, izobahingura rwose ubgayo, izobaremesha, ibahe inkomezi. 11 Ububasha bube ubgayo ibihe bitazoshira. Amen.“
Kwicisha bugufi ni igihushane co kwishira hejuru. Uwicisha bugufi yumva ko ubwiwe atihagije akumva akeneye ko ivy’akora vyose ashaka ko Imana aba ariyo ibigaragaramwo, igashirwa hejuru.
Aha rero bigaragarira mû kwizigira Imana no kuyikorera ibimugoye vyose, kwirinda ibiboreza ( ivyoza gutwara umutima wiwe akawukura ku Mana), guhagarara mû kwizera imbere ya Satani no kumurwanya, guha agaciro ubwiza bw’Imana, no kuba igitwazi c’ubushobozi bwayo,…
Ubuntu niwo mugabane w’abicisha bugufi biyegurira Imana uku bukeye uko bwije.
Yokobo 4:6 “Arikw itanga ubuntu burushirije. Ni co gituma ivuga, it’ Imana irwanya abibona, arikw abicisha bugufi ibaha ubuntu .“
Duhitemwo kwicisha bugufi, dukorerwe n’ubuntu bw’Imana.
Umusi mwiza
Pasteur Cassien NIKO
